2021 жылғы 30 маусымда ҚР Денсаулық сақтау министрі А.В. Цойдың швейцариялық "Roche" фармацевтикалық компаниясы директорлар кеңесінің төрағасы Кристоф ФРАНЦПЕН кездесуі өтті.
Кездесу барысында Қазақстандағы пациенттердің өмірі мен емдеу сапасын жақсарту мақсатында Денсаулық сақтау және фармацевтика саласындағы ынтымақтастықты кеңейтудің перспективалық бағыттары талқыланды.
Кездесу барысында Қазақстанда өндірісті оқшаулау және 2020-2025 жылдарға арналған ҚР фармацевтикалық және медициналық өнеркәсібін дамыту жөніндегі кешенді жоспар шеңберіндегі ынтымақтастық, атап айтқанда, бастапқы кезеңде, онкологияға қарсы дәрілік заттардың қаптамасын өндіруді жолға қою және кейінгі кезеңдерде, медициналық препараттар өндірісі мәселелері талқыланды.
Бүгінгі күні ынтымақтастықтың негізгі мүмкін бағыты - ауруларды ерте анықтау, олардың алдын алу және тиісінше неғұрлым тиімді емдеу үшін халықаралық тәжірибені және диагностиканың инновациялық әдістемелерін енгізуге жәрдемдесу болып табылады. ҚР-да өңірлік ғылыми-зерттеу орталығын құру және Қазақстанның жұмыс істеп тұрған онкологиялық орталықтарының бірінің базасында онкологиялық ауруларды зерттеу жөніндегі қазіргі заманғы зертхана ашу мүмкіндіктері қарастырылуда.
Roche компаниясы диагностиканың жаңа әдістерінің тиімділігін бағалау мақсатында зерттеу/пилоттық жобаларды жүргізу үшін әдіснамалық қолдау, сондай-ақ қажетті зертханалық жабдықтармен материалдық-техникалық қамтамасыз ету арқылы диагностиканың жаңа әдістерін енгізу бойынша жәрдем көрсетуге дайын.
Сондай-ақ, Қазақстан Республикасына инновациялық препараттарды жеткізу мүмкіндігі қарастырылды.
Естеріңізге сала кетейік, Қазақстан Республикасы Денсаулық сақтау министрлігі мен Roche компаниясы арасында 2019 жылдың қазан айында ынтымақтастық және өзара түсіністік туралы меморандум жасалды.
Фармацевтикалық өнеркәсіпті дамыту және Қазақстанға ірі фармацевтикалық компанияларды тарту шеңберінде "СК-Фармация" ЖШС Roche-мен бірқатар кездесулер өткізді, олардың барысында Қазақстан фармацевтикалық индустриясына Roche тарапынан келісімшарттық өндіріс және инвестициялар мәселелері талқыланды.
Анықтамалық:
Рош Холдинг https://ru.wikipedia.org/wiki/Roche_Holding -фармацевтика саласындағы әлемдік көшбасшылардың бірі, биопрепараттардың жетекші өндірушісі (онкология, вирусология, ревматология, трансплантология), онкологиялық ауруларды диагностикалаудағы көшбасшы, қант диабетін өзін-өзі бақылау саласындағы пионер. 24 Roche препараты ДДҰ негізгі дәрі-дәрмектер тізіміне енгізілген.
Roche холдингі "Genentech" (АҚШ) компаниясына және "Chugai Pharmaceutical" (Жапония) акцияларының бақылау пакетіне тиесілі. Әлемнің 150 еліндегі Roche өкілдіктерінде 90 мың қызметкер жұмыс істейді.
.jpeg)
